14.12.19
Der Brice het am Vorabu gfreget ob wer nid „la grasse matiné“ welle machu.
Äs sind de alli froh gsi, hewer zer Abwäxlig chennu üsschlafu. Und na duma
feinu Frühstück siwer losgetuckrut. Seglu, das geid inner Antarktik nid so
wirklich, äs hed eifach kei Wind und wenn Iischscholle umcha sind isch eh
besser wemmu genau d’Richtig und z’Tempo cha stiiru.
Äs isch wieder as Prachtstagji gsi, im Neumeierkanal hets im südlichu Teil
relativ vil Iisch dri kä und di Podorange isch zuma chleinu Iischbrächer
mutiert. Je wiiter nördlich wir si cho um so weniger Iisch isch de umcha
gsi und umso besser is gangu.
Wier sinisch vorcho wie im Kino, z’Wätter und z’Panorama isch so
idrücklich gsi das fasch alli der ganz Tag meh oder weniger an Deck mit
stüünu verbrunngu hent. D’Antarktisch Bärgwält mit zerklüftetu Geltscher
isch an isch verbigezogu, hie und da an gwaltige Iischbärg und derzwischu
hent chleineri Gletscherabbrich und springundi Pingus fer Action gsorget.
Churz vor ischum Ankerplatzji hewer de no an zwei nid ganz heimischi
Pinguarte chennu beobachtu. Der rot/grau Quark-SUP Pingu, waschi
eiflüglig fortbewegt, schine Flügel glicht duma lengu Paddel und d’Fiess
duma breitu Board. Und der Gälb/Schwarz Quark Pingu. Fa de Gälb/Schwarze
hets de zimli vil käbbet und di sind isch um d’Ohru gflizzt das der Brice
bim Quark-Explorer het miessu intervennieru.
Der Plan isch eigentlich gsi Kajaku und an Landüsflug zur Pingukolonnie.
Wills aber an Land meh Qurak- als Eselpingus het käbbet, hewer der Bsüoch
bi der Pingukolonie uf speter verschobu.
As vierer Gruppelti isch de ga Kajaku und d’Manu het de so gmeint
„nager???“, Ja was? Badu? ärnscht haft???? Und so isch eis fer eis ins
Badewasser gsprungu umgäbu fa Iischwürfeltini. Summi ganz elegant mit duma
perfektu Chöpfler oder duma Rückwärtssalto, annri as bitzji weniger. Na
der Badesession kehrunt 100% fa ische Frowe zum Arktischu Badeclub und
immerhin an Drittel fa de Männer, sind ächt d’Frowe wirklich dräckiger
gsi? Wies schi fer Badeferie kehrt hewer derna no as bitzji im Bikini,
oder bzw der Unnerwäsch gsünnelut. Im Gägusatz zum Wasser (Temp < 1°C)
hetnisch z’Sunna kehrig gwermut.
Als di gälbu Pingus sind wäg gsi hewer eigentlich no an Land wellu aber
churz vorher sind Iischbärga z’tribu cho, dennu het im Gägusatz zur
Podorange der Anker gfehlt. So hewer de anners Ankreplatzji miessu süochu
und schlussändlich is de d’spat gsi. Zum ZNacht het nisch der Thomas mit
schinum Tessinerrissotto und die Crew fa der Podorange mit Gmiess, Fisch
und Dessert verwennt. Ich hä mi eigentlich uf Bigsutomate und Bigsubohne
fer 4 Wuche igstellt aber weit gefehlt. Kulinarisch wärdewer wirklich
verwennt.
Hittu siwer de wieder uf Schgiitüür gangu. Geschter hets no gheissu 600m,
hittu sinds de pletzlich 800m gsi, das mit dennu Höhumeter und Dischtanze
isch hie as bitzji inflationär..... Aber na dem isch z’Dinghi näbu dera
andru Pingukolonnie het üsglah (ohni gälbi oder roti Pingus), und isch
d’Eselspinguina mim afällu zuöglüüget hent is locker die 800 m abrüf
gangu, wier si mit dera bombastischu Üssicht uf die Bucht, die Podorange
und diversi Packboats belohnt wordu. D’Abfahrt isch perfekte Sulzschnee
gsi, tja sogar inner Antarktis wird mu belohnt wemmu am morgu rächtziitig
los geid. Z’Unnersch het nisch an einzelne „Bärgstiiger“-Eselspingu
willkommu geheissu und wier hei de no di ganz Kolonnie bestüünt, ohni
Touris. Faziit wier si alli meh wa zfridu uf ischum Segelbootji und das
wer die Cruisships meischtns nummu fa wiitum gseh. Na dum Mittagässu uf
Deck siwer de wiiter gschipprut, mit Seglu isch wieder nix gsi. Der Brice
het 3 Buckelwala und as Rudel fa Pinguina gepstellti kä und di hent nisch
de tatsächlich an faszinierundi Show gebotu. An Buckelwal isch so noch ans
Boot cho das wer nisch zer Sicherheit am Bootji hei käbbet, mu weiss ja
nie..... Voilà, der Tag isch eu scho fasch wieder durch...... Momentan
süochewer na duma Ankerplatzji fer hinna mabu. De appa Apero und Ässu, was
gids ächt hittu?
Der Wätterbricht fer die Drakepassage zeigt momentan 24h wenig und derna
kehrig Wind, mmh d’Eintu gfrewunntschi uf d’Seglu, d’anndru uf zStugeron,
aber in einem Punkt siwernisch einig, an d’Rückfahrt wellewer eigentlich
no gar nid deichu und d’Anarktis bis zum letschtu Momänt gniessu.
Keine Kommentare:
Kommentar veröffentlichen